الجزء الأول من حوار برينور- مصر مع الجبرتي

المقدمة ::

هذا الحوار خيالي و فكرته مستوحاه من مقالات الصحفي الكبير عزت السعدني بجريدة الأهرام إلا أن الهدف منه توثيق ما حدث علي مدار عام 2014 بمجتمع ريادة الأعمال و المشروعات الصغيرة و المتناهية الصغر بطريقة جديدة “خارج الصندوق”. فإلي الحوار

لمعرفة معلومات أكثر عن المؤرخ الكبير و العالم الجليل إضغط هنــــــــــــــــــــــــا

الحـــــــوار

الجبرتي ::السلام عليكم يا أهل برينور – مصر . كيف حالكم و كيف حال مصر المحروسة ؟

برينور – مصر :: و عليكم السلام يا مولانا و رحمة الله و بركاته – مصر المحروسة كويسة و أهلها كمان كويسين بفضل الله – يا سلام يا مولانا الله ينور عليك مواعيدك تمام يا رب رواد الأعمال المصريين كلهم تكون مواعيدهم زيك كده.

الجبرتي :: آمين يا ( برينور – مصر ) – قولي إنت رنيت لي علي البيجر بتاعي و أنا باخد الحمام بتاعي في الحمام البلدي بحارة النحاسين – كنت عاوز حاجه.

برينور – مصر :: أيوه يا مولانا أصل أنا قولت بما إن فضيلتك مؤرخ محترم و أمين و بتؤرخ لكل ما يحدث في مصر المحروسة فقولت يا ريت تجيب دفتر جديد و يكون هذا الدفتر خاص بتأريخ ما يحدث في دنيا ” ريادة الأعمال و المشروعات الصغيرة و المتناهية الصغر ” في مصر و الدفتر يكون يكون منفصل عن الدفتر اللي فضيلتك بتأرخ فيه ما يحدث في مصر من أحداث عامة و يسجله الكاتب الصحفي الكبير عزت السعدني بجريدة الأهرام.

الجبرتي :: ما تقلقش يا ( برينور – مصر ) عملت حسابي و جبت لك دفتر جديد مع العلم إني بسجل الأول علي ورق زبده و بعد كده بأنقله أو بلغتكم يا مصريين اليومين دول ” ببيضه ” علي ورق بردي نضيف و في الاخر بودي الورق لحارة النساخين اللي بيخيطوا الورق مع بعضه بخيوط مزدوجة من الحرير و القطن أو بلغتكم بتاعة اليومين دول ” بكعبه ” ثم أحطه بمكتبتي بعد ذلك و بكده كل حاجة تكون عندي محفوظه أو “متسيفه” بلغتكم و أجيب واحد نساخ يعملي نسخة ثانية تحتفظ بها الدولة في الكتب خانة الموجودة بكورنيش بولاق قبل الميناء النهري في بولاق اللي بترسي عنده المراكب النيلية و بكده كمان يكون عندي نسخة إحتياطية أو بلغتكم ” باك اب “.

برينور – مصر :: الله ينور يا مولانا سمعتك لم تصل للسماء في تأريخ الأحداث من فراغ – الله يكرمك. المهم نبدأ باه تأريخ ما حدث في ” ريادة الأعمال و المشروعات الصغيرة و المتناهية الصغر ” في مصر.

الجبرتي :: توكلنا علي الله ، أنا جاهز و الريشة جاهزة و دواية الحبر مليانة . هات ما عندك و

بسم الله الرحمن الرحيم

برينور – مصر :: علي الله توكلنا و بسم الله الرحمن الرحيم  – شوف يا مولانا سنة 2014 بدأت طبعاً بشهر يناير و حدث فيه ما يلي ::

بداية التعاون بين موقع ( برينور – مصر ) و إدارة مشروع الطاقة الحيوية و التنمية المستدامة التابع لوزارة البيئة.

الجبرتي :: طاقة حيوية – يعني ايه الطاقة  اللي بتقول عليها حيوية دي ؟

برينور – مصر :: هي الطاقةالمتولدة نتيجة إستخدام مخلفات الحيوانات.

الجبرتي :: كويس إنكم إبتديتم تبصوا حواليكم و تأخذوا بالكم لكم من الفرص الموجودة حواليكم و حلول مشاكلكم الموجودة تحت رجليكم. ايه تاني حصل في يناير 2014 ؟ علي فكرة إحنا سبقناكم في كده لآن المصريين في القرن الثامن عشر اللي إتولدت فيه كانوا بيستخدموا كخلفات حيوانات الحقول “البهائم” كحطب لإشعال نيران طهي الأطعمة بالأفران البلدي و الفلاحين بالأرياف حتي اليوم يستخدمون هذه الطريقة. عامة بداية إيجابية للعام إيه تاني …

برينور – مصر :: أجرينا حوار مع م / مصطفي فرحات أحد مؤسسي موقع ” نفهم ” أهم و أفضل موقع تعليمي في مصرو العالم العربي و أول خطوة علي أرض الواقع في مكافحة الدروس الخصوصية و تسهيل و تبسيط المناهج التعليمية للتلاميذ يا مولانا.

الجبرتي :: برافو عليهم الشباب دول إنهم إهتموا بالتعليم فمفتاح تقدم الأمم في التعليـــــــــــــــــــم . اللي قولي هو الأحداث و الأخبار اللي هتقولهالي كلها خاصة ب ( برينور – مصر ) بس !

برينور – مصر :: طبعاً لا يا مولانا و أنا أقدر أعمل كده لكن تسلسل الأحداث بس بالمصادفة كان خاص ب ( برينور – مصر ) – الخبر الجاي خاص بمسابقة المؤسسة العربية للعلوم و التكنولوجيا – مسابقة خطط الأعمال و الملقبة ب TBPC و الخبر هو إنعقاد ورش العمل الخاصة بالمرحلة قبل النهائية من المسابقة بجامعة النيل بالقرية الذكية بالقاهرة في 19 يناير 2014.و أخيراً أحد أهم الأحداث و الحوارات التي قام بها بها ( برينور – مصر ) و هي حوار ( برينور – مصر ) مع رئيس بورصة النيل للمشروعات الصغيرة و المتوسطة السيد / محمد عمران و بهذا الحوار أصبحنا أول موقع أو جهة في مجال ريادة الأعمال تجري حوار معه و الحوار كان ملي بالمعلومات عن بورصة النيل و كيفية العمل بها. وبكده إنتهت الأحداث المهمه في يناير 2014.

الجبرتي :: تمام خش باه علي فبراير اللي إنتم بتسموه “فإراير” رغم إن الشهر ده حصلت حاجات و إنتصارات كثيره فيه و ما يستحقش إنكم تسموه كده و ده طبعاً من قلة قرأتكم للتاريخ.

برينور – مصر :: وشي منك في الأرض يا مولانا لأن كل اللي بتقوله صحيح دا إحنا حتي بدون ما نقرأ التاريخ فاللي عاصرناه في فبراير 2011 و إنتصار ثورتنا الرائعة ” ثورة 25 يناير ” و إطاحتنا بمبارك و نظامه في 11 فبراير 2011 من المفروض إنه يخلينا نبطل نسمي فبراير الاسم ده. المهم فبراير كان شهر مهم للمصريين و العرب كلهم لآن حصل فيه “مؤتمر رواد العرب الأول بجامعة الدول العربية ” بالقاهرة و برينور – مصر كان حاضر فيه بعد ترشيح حاضنة الأعمال “بداية” التابعة لوزارة الإستثمار لنا لحضور المؤتمر و الحمد لله شرفنا مصر و “بداية” و لولا خوفي من الإطالة لذكرت ما حدث.

الجبرتي :: معلش إبقي إحكيلي بعد الحوار و لو اللي عملتوه زي ما بتقول هسجله – المهم ايه تاني حصل.

برينور – مصر :: معلش يا مولانا الحدث الثاني  خاص ب ( برينور – مصر ) و هو عيد ميلاد ( برينور – مصر ) الأول.

الجبرتي :: كل سنة و أنتم طيبين يا أهل ( برينور – مصر ) و بالمناسبة زوار الموقع خلال أول سنة كانوا من كام دولة حكم أنا عارف إنكم منتشرين في دول كثيرة.

برينور – مصر :: الزوار النشيطين خلال أول سنة كانوا من 52 دولة يا مولانا و دا بيثبت صحة رؤيتنا أن المحتوي العربي علي الإنترنت مطلوب بشدة و يكفي أقول لفضيلتك أن أكثر زوار بيقعدوا علي الموقع هما الزوار اللي من بره مصر و المثال علي ذلك السويد و الصين اللي الزوار من عندهم بيقعدوا مش أقل من 8 دقائق علي الموقع – الشكر لله.

الجبرتي :: الله ينور عليكم – يا تري فبراير خلص و الا لسه .

برينور – مصر :: لا خلص يا مولانا و نخش دلوقتي علي مارس / 2014.

الجبرتي :: إسرد يا سيدي.

برينور – مصر :: أول الشهر كان حدث مهم يا مولانا لآن يوم 1 مارس كان حفل تخرج الدفعة الأولي من حاضنة الأعمال الحكومية ” بداية ” و كان يوم رائع بالإضافة إلي أنه تم عقد ورشة عمل في منتهي الأهمية حول ” مستقبل ريادة الأعمال في مصر ” و تأتي أهمية هذه الورشة من عنصرين هما عنوان الندوة – و- ضيوفها الذين حضروا من مختلف دول العالم مثل السيد / بريستون جيمس مدير إدارة ريادة الأعمال بشركة Dell العالمية .دا إحنا حتي ربنا وفقنا و عملنا حوار مع السيد / بريستون جيمس و رغم إنه حوار قصير إلا أنه كان مهم لما إحتواه من نواحي تركز علي نواحي الضعف و القوة بمجتمع ريادة الأعمال في مصر.

الجبرتي :: كل ده في يوم 1 مارس بس امال بقية الشهر حصل فيه إيه.

برينور – مصر :: كان فيه مؤتمر الصناعة و الجامعة  و المؤتمر أهميته تأتي من أنه يساهم في ربط المحتوي العلمي و التعليمي بالجامعات بما تحتاجه الصناعة المصرية.

الجبرتي :: يا رب يرتبطوا ببعض علشان نحل مساكلنا و نبطل إستيراد – اللي بعده

برينور – مصر :: حوار ( برينور – مصر ) مع رجل الأعمال / أحمد الألفي مؤسس مسرعة الأعمال Flat6Labs و شركة رأس المال المخاطر   Sawari Ventures  و الحوار ده تم بعد محاولات عديدة للإلتقاء و لم تكن تتم لإنشغال رجل الأعمال أو سفره لكنه تم بفضل الله و الحوار كان ثري فعلاً . الحدث التالي كان مؤتمر Money Cycle و بكده مارس خلص يا مولانا.

الجبرتي :: روح يا مارس ة تعالي يا أبريل

برينور – مصر :: كان فيه حدث مهم واحد فقط و هو ورشة العمل التي عقدها موقع “ومضة” بالجامعة الأمريكية بالقاهرة تحت عنوان Mix ‘n Mentor.

الجبرتي :: خش علي مايو و التوقيت الصيفي يا حبيب قلبي.

برينور – مصر :: عليك نور يا مولانا فمايو فعلاً كان ساخناً في أحداثه حيث بدأ ب “منتدي مصر دوت بكره” اللي كان زحمه علي آخره و ورش العمل كانت فيه بالطابور ، ثم كانت فعاليات ” ستارت اب الجيزة ” و منافساته الشديدة و في نهاية الشهر كان إعلان نتيجة مسابقة MIT  إحدي أقدم و أقوي و اهم مسابقة رواد الأعمال في الشرق الأوسط و العالم . بالمناسبة يا مولانا الشهر ده كان بداية التعاون بين ( برينور – مصر ) و مؤسسة EFE  للتعليم من أجل التوظيف .

الجبرتي :: خلص مايو يا سيدي والا لسه ؟

برينور – مصر :: خلص يا مولانا – خير عاوز حاجة

الجبرتي :: طبعاً عاوز أشرب شوية ميه

برينور – مصر :: من عينيا يا مولانا و أدي القله – بالمناسبة فضيلتك بتحب تشرب من القلة أم من الأبريق ؟

الجبرتي :: لما اشرب أقولك يا ريادي يا ذاللني

برينور – مصر :: أعوذ بالله من كده يا مولانا – ليه بتقول كده هو فضيلتك مش عارف غلاوتك عندي و عند المصريين .

الجبرتي :: و لما أنا غالي كده بتسالني قبل ما اشرب – طب أشرب الأول و بعد كده إسالني.

برينور – مصر :: حقك علي رأسي يا مولانا و آدي القله و الأبريق و الإثنين مليانين كمان و بالهنا و الشفا.

الجبرتي :: الحمد لله – يفضل الصغار و كبار السن زي حالاتي الشرب من الأبريق حتي لا يغرقوا أنفسهم أما القله فيفضلها الكبار و الشباب – عرفت انا بحب أشرب من إيه – يالا سمعني يا حبيبي أحداث شهر يونيو.

برينور – مصر :: كان عندنا حدث مهم واحد و هو مؤتمر Euro Med الذي نظمته هيئة الإستثمار و كان الضيوف الأجانب من دول البحر المتوسط نسبة كبيرة و الهدف من المؤتمر محاولة خلق روابط عمل بين الشركات من دول البحر المتوسط بمختلف أحجامها و هو مؤتمر مهم جداً بالتأكيد.

إلي اللقاء في الجزء الثاني و الأخير من حوار الجبرتي مع برينور – مصر